နှစ်သစ်အတွက်

ကျွန်တော်အရမ်း ကြည်နူးနေမိတယ်။ နှစ်သစ်ကို ကြိုတာ တော်တော် စောနေသေးမှန်း သိပါတယ်။ အရင်ကလို ပြင်ဆင်ခွင့်မရှိလို့ တမ်းတစိတ်နဲ့ ဘလော့မှာ ပြင်ဆင်ပြီး စောစော ရေးမိတာလဲ ပါပါတယ်။ လာလည်ပြီး ဆုတောင်း ၊ ကောင်းချီးပေးသွားကြတဲ့ သူငယ်ချင်းအားလုံးကိုလည်း ကျေးဇူး အရမ်းတင်မိတယ်။ ဟိုး အရင်နှစ်တွေကတော့ ခုလို ရက်မျိုးတွေမှာ ခရစ်စမတ်ပင်နဲ့ တူတဲ့အပင်လေးတွေ လိုက်ရှာပြီး ကိုင်းကိုခုတ် ၊ တချို့နှစ်တွေမှာတော့ ပလပ်စတစ် အပင်လေးတွေ ဝယ်ပြီး ပန်းအိုးကြီးကြီးထဲ အတင်းထိုးစိုက် ၊ မီးဆိုင်းလေး ဖဲကြိုးလေးတွေပတ် ၊ လက်ဆောင် ပစ္စည်းလေးတွေ ချိတ် ၊ အနီးစပ်ဆုံး တူအောင် ဖန်တီးပြီး ကြည်နူးနေခဲ့ရတာပေါ့။ နှင်းကျတာနဲ့ တူအောင် ဂွမ်းစလေးတွေ မွပြီး အပင်မှာတောင် ကိုက်ကပ်ခဲ့ရသေးတာ။ မိသားစု စကားပြောရင်တောင် ခရစ်စမတ်ပင်လေးနားမှာ စကားဝိုင်းဖွဲ့ခဲ့တာပေါ့။ ခုတော့ ဂွမ်းစလေးတွေ မဟုတ်ပဲ တကယ့် နှင်းတွေ ဖွေးဖွေးဖြူ ကပ်နေတဲ့ ခရစ်စမတ်ပင် အကြီးကြီးတွေ ရှေ့ရောက်နေရတာလေ။ အရင်ကလို သီချင်းလေးတွေ တိုက်နေခွင့် ဆိုနေခွင့် မရပေမယ့် ရင်ထဲမှာတော့ လွမ်းဆွတ်စွာနဲ့ အမှတ်တရ လိုက်ဆိုနေမိပါတယ်။ ရစ်သမ် ဂစ်တာလေးနဲ့ ဆိုထားတဲ့ ခရစ်စမတ် သီချင်းလေးတွေ သူငယ်ချင်းတို့မှာ ရှိနေရင် ပို့ပေးဖို့ တောင်းဆိုပါတယ်ဗျာ။ မနေ့က ရှာထားတဲ့ ဓါတ်ပုံလေးတွေလဲ တင်ပေးလိုက်ပါတယ်။ နှစ်သက်ရင် ကူးယူပြီး ကြိုက်နှစ်သက်ရာ နေရာမှာ အလှဆင်နိုင်ပါတယ်ဗျာ။