ဒုတိယသင်္ကြန်အကျနေ့ရဲ့ သင်္ကြန်ပွဲ

သင်္ကြန်အကြိုနေ့မှာ သူငယ်ချင်း ဘလော့ဂါတွေနဲ့ လည်ခဲ့ပြီး ဒီနေ့လို နှစ်တိုင်းမကြုံနိုင်တဲ့ သင်္ကြန်ဒုတိယအကျနေ့မှာတော့ ကျနော်တို့ ကျောင်းမှ မြန်မာနိုင်ငံတော် သံရုံးမှ လူကြီးများနဲ့ ရုရှားဆရာ ဆရာမများကို ဖိတ်မဏ္ဍကပြုကာ သူငယ်ချင်း ညီအကိုတစ်တွေနဲ့ စည်စည်ကားကား ကျင်းပခဲ့ကြပါတယ်။ ဒီနိုင်ငံသားများမှ မြန်မာတို့ရဲ့နှစ်သစ်လို့ အသိအမှတ်ပြုကြတဲ့ နေ့ရက်လေးတစ်ရက်လဲ ဖြစ်ပါတယ်။ ရောက်စကဆို ဧပြီလမှာမှ နှစ်သစ်ကူးတဲ့ ကျွန်တော်တို့ရဲ့ မြန်မာဓလေ့ကို အထူးအဆန်းမေးလို့ ရှင်းပြခဲ့ရတာလေးကို မှတ်မိပါသေးတယ်။ နောက်တော့ အက်ဆေးရေးရင်လဲ မြန်မာတို့ရဲ့ နှစ်သစ်ကူး သင်္ကြန်ပွဲအကြောင်းကို အလေးပေးပြီး ရေးခဲ့ကြပါတယ်။ အပိုင်နိုင်ဆုံးဖြစ်အောင် ရေးလာကြတော့ ဒီနိုင်ငံမှ ဆရာ ဆရာမများရဲ့ စိတ်အဝင်စားဆုံး အက်ဆေးတစ်ပုဒ်လဲ ဖြစ်ခဲ့ရပါတယ်။ ယဉ်ကျေးမှုတွေ ဘယ်လိုပင် ကွာခြားပါစေ နှစ်ဟောင်းက အညစ်အကြေးတွေကို သင်္ကြန်ရေနဲ့ ဆေးကြောပြီး နှစ်သစ်ကို ကြိုဆိုတဲ့ မြန်မာ့ဓလေ့ကို သဘောကျ နှစ်သက်ကြတာကို တွေ့လာရပါတယ်။ မနှစ်ကဆိုရင် မြန်မာကို သုံးခေါက်လောက် ရောက်ခဲ့ဖူးတဲ့ ရုရှားနိုင်ငံသားများနဲ့ မြန်မာဘာသာ သင်နေသော သင်တန်းသားများပါ တက်ရောက်ခဲ့ပါတယ်။ မြန်မာစကားတတ်ထားသူက ကျေးဇူးတင်စကား ပြောသွားတဲ့အခါ မြန်မာသင်္ကြန်တွင်းမှာ ရဟန်းတစ်ခါ ဝတ်ခဲ့ဖူးတယ်လို့တောင်ဆိုလို့ အံ့သြဝမ်းသာခဲ့ရပါတယ်။ မြန်မာ့ယဉ်ကျေးမှုနဲ့ ဗုဒ္ဓဘာသာ ကျယ်ပြန့်လာတဲ့အတွက် ဂုဏ်ယူခဲ့ရပါတယ်။ ဒီနှစ်တော့ သူတို့မရောက်လာခဲ့ပါဘူး။

ကျွန်တော်တို့ရဲ့ ဒီနေ့ပွဲလေးက ဓါတ်ပုံတွေကို သူငယ်ချင်းများ ခံစားနိုင်အောင် မျှဝေလိုက်ပါတယ်။ သင်္ကြန်တွင်း ကွန်ပျူတာရှေ့မှာတင်နေပြီး ပွဲအမျိုးမျိုး တက်ရအောင်ပေါ့ဗျာ။သင်္ကြန်ပွဲကျင်းပတာကတော့ ကျွန်တော်တို့ကျောင်းက ကျောင်းသားကျောင်းသူများအတွက် ဖွင့်လှစ်ထားတဲ့ ကော်ဖီဘားပါပဲ။ မနက်အစောကြီး ထပြီး အိပ်ချင်မူးတူးနဲ့ အခမ်းအနား ပြင်ဆင်ခဲ့ရပါတယ်။

သူတို့ကတော့ ခက်ခက်ခဲခဲ မှာယူထားရတဲ့ ဒိုးပတ်အိုးစည်များနဲ့ မြိုင်မြိုင်ဆိုင်ဆိုင် တီးမှုတ်ခဲ့ကြတဲ့ တီးဝိုင်းသားများ ဖြစ်ပါတယ်။ ကီးဘုတ်နဲ့ ဂစ်တာတီးခတ်နိုင်သူနဲ့ ပေါင်းစပ်ထားတဲ့ BAND လေးတစ်ခုသဖွယ်ပါပဲ။

မြန်မာ့ရိုးရာ ဦးရွှေရိုးနဲ့ ဒေါ်မိုးအက ကပြနေကြတာပါ။ ရုရှားဆရာ ဆရာမများ သံချပ်ကို နားမလည်ကြပေမယ့် ဦးရွှေရိုးနဲ့ ဒေါ်မိုးတို့ရဲ့ အကနဲ့ အမူအယာတို့ကို စိတ်ဝင်တစား ကြည့်ပြီး ရီမောနေခဲ့ကြပါတယ်။

လှပျိုဖြူတို့ရဲ့ သင်္ကြန်ယိမ်းအက ဖြစ်ပါတယ် :P တကယ်ကို ညီညီညာညာနဲ့ ကခဲ့ကြတဲ့ ညီလေးနှစ်ယောက်ပါ။ မအံ့သြနဲ့နော် တော်ရုံ ယိမ်းအဖွဲ့လောက်ရဲ့ အချိုးအဆစ်တော့ အသာလေးပဲဗျ။ သူတို့လဲ ကျောချမ်းချမ်းနဲ့ ကြိုးစားကပြခဲ့ကြပါတယ်။ အဆိုကောင်း အကကောင်းနဲ့ပေါ့။း)

ရေလောင်းရင်းနဲ့ ပျော်ပျော်ပါးပါး ကနေကြတာ ဖြစ်ပါတယ်။ ရေလောင်းမခံဖူးတဲ့ ဆရာ ဆရာမများကတော့ ရေစိုမှာ စိုးလို့ ဟိုပြေး ဒီပြေးဖြစ်နေလေရဲ့း) သင်္ကြန်သီချင်းတွေကြားမှာ အားလုံး နစ်မျောလို့ပေါ့။

မှတ်တမ်းတင် ဗီဒီယိုရိုက်ပေးရာကနေ ဒါရိုက်တာအကျော်အမော် ဖြစ်အောင်ထိကြိုးစားနေတဲ့ ကျွန်တော်ပေါ့ဗျာ။ ရှင်ပြု နားသ အလျှူမင်္ဂလာပွဲများ မှတ်တမ်းတင်ရန် အော်ဒါလက်ခံသည် ဟတ်ဟတ်